Listahátíð í Reykjavík fer fram 1. - 16. júní 2024.

VALMYND

Ársfundur fulltrúaráðs Listahátíðar í Reykjavík fór fram í Safnahúsinu fimmtudaginn 14. nóvember og var afar vel sóttur. Aðild að fulltrúaráði eiga allar helstu menningarstofnanir landsins og fagfélög listafólks.

Einar Þorsteinsson borgarstjóri tók við formennsku fulltrúaráðs af Lilju Dögg Alfreðsdóttur menningarráðherra en ráðherra og borgarstjóri gegna formennsku og varaformennsku til skiptis. 

Margrét M. Norðdahl, sem setið hefur í stjórn Listahátíðar fyrir hönd borgarstjóra frá árinu 2014 vék úr stjórn og voru henni þökkuð vel unnin störf í þágu hátíðarinnar með þéttu lófataki. Nýr fulltrúi borgarstjóra í stjórn er Katrín Jakobsdóttir og verður hún formaður hennar næstu tvö árin en fráfarandi formaður, Sigtryggur Magnason, tekur við varaformennsku og situr áfram sem fulltrúi ráðherra. Tryggvi M. Baldvinsson situr áfram í stjórn Listahátíðar fyrir hönd fulltrúaráðsins. 

Á fundinum voru að venju flutt nokkur erindi sem gefa mynd af síðasta ári í starfi Listahátíðar.

Formaður stjórnar, Sigtryggur Magnason gaf skýrslu stjórnar.

Vigdís Jakobsdóttir fráfarandi listrænn stjórnandi gaf skýrslu um nýliðna Listahátíð 2024 sem var jafnframt síðasta hátíð Vigdísar. Hátíðin var einstaklega vel sótt í ár og að henni komu um 900 listamenn. Vigdís nýtti tækifærið til að þakka fulltrúaráði fyrir ómetanlegt samstarf í gegnum árin en Vigdís hóf störf hjá hátíðinni árið 2016 og var endurráðin árið 2020.

Framkvæmdastjóri Listahátíðar, Fjóla Dögg Sverrisdóttir kynnti ársreikning 2023 ásamt uppgjöri hátíðar og fjárhagsáætlun 2024-2025. Fjárhagsstaða hátíðarinnar er góð og uppgjör hátíðarinnar í ár var í takt við áætlanir.

Nýráðinn listrænn stjórnandi Lára Sóley Jóhannsdóttir flutti erindi um sína framtíðarsýn fyrir hátíðina og sagði meðal annars:

„Það er mér mikill heiður að fá tækifæri til þess að vinna að Listahátíð í Reykjavík og byggja á þeirri þrotlausu, óeigingjörnu og framúrskarandi vinnu sem einkennt hefur hátíðina. Fyrst og fremst vil ég sjá hátíð þar sem við öll upplifum að við tilheyrum opnu, umvefjandi og framsæknu samfélagi þar sem listir fá að dýpka og víkka okkur sem manneskjur.”

Borgarstjóri gaf bæði Margréti M. Norðdahl og Vigdísi Jakobsdóttur blóm í þakkarskyni fyrir frábærlega vel unnin störf í þágu hátíðarinnar og menningarlífs borgarinnar. Tóku fundargestir undir orð hans og fögnuðu þeim vel.

Katrín Jakobsdóttir nýr formaður stjórnar

Vigdís Jakobsdóttir lauk störfum sem listrænn stjórnandi Listahátíðar í Reykjavík 30. september síðastliðinn eftir átta farsæl ár í starfi.

Leiðarljós Vigdísar í starfi var að listir og menning væru ekki forréttindi fárra heldur réttur allra. Þetta voru sannarlega ekki orðin tóm heldur lét hún verkin tala. Á starfstíma sínum leiddi hún mikilvæga stefnumörkun fyrir hátíðina með áherslu á aðgengis- og umhverfismál og hreif samstarfsfólk sitt með sér í að vinna að þessari sýn. Hún leitaði sífellt nýrra leiða til að færa sem flestum menningarviðburði í hæsta gæðaflokki og lagði mikla áherslu á að listafólk og listviðburðir á hátíðinni endurspegluðu samfélagið í allri sinni breidd og fjölbreyttu fegurð.

Vigdís sýndi mikinn metnað, hugrekki og hugmyndaauðgi í starfi. Þessir eiginleikar hennar skinu skært í heimsfaraldrinum 2020-2021 þegar dagskrá Listahátíðar 2020 var dreift yfir rúmt ár og viðburðum var hrint í framkvæmd eftir því sem samkomutakmarkanir leyfðu. Vakti það mikla athygli þegar tilkynning barst frá Listahátíð um að henni væri ekki aflýst, ólíkt fjölda hátíða og viðburða sem aflýst var á þessum tíma. Undir lok árs 2020 voru almenningi færðar listagjafir um land allt en það framtak gladdi bæði landann sem og listafólk sem hafði vart getað komið fram svo mánuðum skipti.

Stjórn og framkvæmdastjóri Listahátíðar þakka Vigdísi fyrir gjöfult og gæfuríkt samstarf og fyrir að sýna metnað, kjark og hlýju í starfi. Við óskum henni alls hins besta í hverju því sem hún tekur sér fyrir hendur og þökkum það góða veganesti sem hún skilur eftir hjá hátíðinni.

Ljósmyndin af Vigdísi Jakobsdóttur var tekin af Golla fyrir Heimildina. 

Vigdís lýkur störfum hjá Listahátíð

Skrifstofa Listahátíðar í Reykjavík er flutt úr Gimli, Lækjargötu 3 að Austurstræti 5, 4. hæð. Listahátíð er hér í mjög góðum félagsskap en á sömu hæð má finna Myndlistarmiðstöð, Safnaráð, Sviðslistamiðstöð, Miðstöð íslenskra bókmennta og List fyrir alla. Í sama húsi á 2. hæð má einnig finna Tónlistarmiðstöð. 

Listahátíð í Reykjavík hefur verið á Bernhöftstorfunni frá upphafi en hún hóf starfsemi sína í einu herbergi í Gimi árið 1969. Árin 1995-2010 var starfsemi Listahátíðar í bakhúsinu sem hýsir nú Kornhlöðuna og flutti þá aftur í Gimli.

Til að byrja með er aðeins aðgengi frá Austurstræti en lyftan þar er gömul og því ekki aðgengileg öllum. Verið er að betrumbæta aðgengi að húsinu frá Hafnarstræti og má búast við fullu aðgengi að skrifstofu Listahátíðar innan nokkurra vikna. 

Nýtt póstfang hátíðarinnar er Austurstræti 5, 101 Reykjavík.

Listahátíð er flutt í nýtt húsnæði

Brynhildur Guðjónsdóttir stígur á svið í NASSIM!

Af óviðráðanlegum orsökum getur Ólafur Darri Ólafsson því miður ekki leikið sýninguna NASSIM eins og áætlað var þann 5. júní. 

En gestir þurfa ekki að örvænta – í hans stað kemur engin önnur en hin margrómaða Brynhildur Guðjónsdóttir, leikkona, leikstjóri og leikhússtjóri Borgarleikhússins. 

Brynhildur bætist í hóp hugrakkra stórleikara en auk hennar ætla þau Halldóra Geirharðsdóttir og Ingvar Sigurðsson að leika sína sýningu hvort af NASSIM, þar sem nýr leikari mætir til leiks á hverju kvöldi og fær hvorki að sjá handritið né æfa sýninguna fyrirfram!

Brynhildur Guðjónsdóttir í NASSIM

Aðrar fréttir

Katrín Jakobsdóttir nýr formaður stjórnar

Vigdís lýkur störfum hjá Listahátíð

Listahátíð er flutt í nýtt húsnæði