Rótarskot

Stefnumót skálda og fræðafólks í Eddu

Skáld með innflytjendabakgrunn og fræðafólk frá Árnastofnun koma saman á lokadegi Listahátíð­ar í hinu glæsilega nýja húsi íslenskunnar, Eddu. Íslensk tunga er samtvinnuð sögu fólksins sem hefur byggt þetta land í aldanna rás­ í örbirgð sem allsnægtum, gleði og sorg, andspænis umhleypingum í náttúru og þjóðlífi.

Nú er fimmta hver manneskja sem byggir landið ýmist fædd erlendis eða á foreldri fætt erlendis og sístækkandi hópur notar og beitir tungumálinu á nýstárlegan hátt. Fjölmenningarsamfélag krefst nýrra orða, hugmynda og nálgana. Hvaða orð og hugtök skortir okkur til þess að fanga breyttan veruleika? Getur þróun tungumálsins haldið í við síbreytilegt samfélag? Hvaða möguleikar felast í því að fleiri og fjölbreyttari hópar fólks takist á við íslenska tungu?

Á þessum viðburði í Eddu á Listahátíð kynnumst við skáldum sem skrifa á íslensku sem öðru máli, heyrum samtöl um þróun tungumálsins og sjáum Landnámu hina nýju verða til. Landnámabók er elsta heimild um landnám Íslands og inniheldur upptalningu á nöfnum landnámsmanna. Á viðburðinum verður lagður grunnur að nýrri Landnámabók með landnemum okkar tíma. Aðflutt fólk er sérstaklega hvatt til að koma og taka þátt.

Samstarfsaðilar: Árnastofnun og Borgarbókasafnið

Stjórnandi: Pedro Gunnlaugur Garcia

Þátttakendur: Ewa Marcinek, Dögg Sigmarsdóttir, Martyna Daniel, Ágústa Þorbergsdóttir, Mao Alheimsdóttir, Elías Knörr, Helen Cova.

Dagskrá:

Hugvekja – Pedro Gunnlaugur Garcia opnar viðburðinn og kynnir Landnámu hina nýju

Samtal – Dögg Sigmarsdóttir, Martyna Daniel og Ágústa Þorbergsdóttir ræða um nýyrði og orðasköpun

Ljóðalestur – Ewa Marcinek og Helen Cova flytja eigin verk

Samtal og skáldskapur – Mao Alheimsdóttir og Elías Knörr segja frá sambandi sínu við íslenskuna og flytja eigin texta

Landnáma hin nýja