Fyrir umsækjendur
Eyrarrósin verður veitt í nítjánda sinn vorið 2025. Viðurkenningin er veitt framúrskarandi menningarverkefni utan höfuðborgarsvæðisins sem hefur fest sig í sessi. Markmið viðurkenningarinnar er að beina sjónum að og hvetja til menningarlegrar fjölbreytni, nýsköpunar og uppbyggingar á sviði menningar og lista. Byggðastofnun, Icelandair og Listahátíð í Reykjavík hafa staðið saman að verðlaununum frá upphafi árið 2005.
Hver getur sótt um Eyrarrósina?
Lista- og menningarverkefni sem eru utan höfuðborgarsvæðisins (á starfssvæði Byggðastofnunar), eru ekki rekin í hagnaðarskyni og hafa sannarlega fest sig í sessi.
Umsóknir um Eyrarrósina þurfa að uppfylla eftirfarandi skilyrði:
- Að verkefnið hafi fest sig í sessi og sé eldra en þriggja ára.
- Að verkefnið hafi listrænan og samfélagslegan slagkraft.
- Að framtíðarsýn fyrir verkefnið sé skýr og stórhuga.
- Að vel hafi verið staðið að rekstri verkefnisins.
- Að verkefnið sé viðbót við menningarlandslagið í sínu nærumhverfi og auki fjölbreytileika menningarframboðs á svæðinu.
- Að verkefnið sé ekki rekið í hagnaðarskyni eða á vegum opinberra aðila.
Hvað eru Hvatningarverðlaun Eyrarrósarinnar?
Veitt verða þrenn hvatningarverðlaun á sama tíma og Eyrarrósarviðurkenningin er veitt. Hver hvatningarverðlaun eru 750.000 krónur.
Umsóknir um Hvatningarverðlaun Eyrarrósarinnar þurfa að uppfylla eftirfarandi skilyrði:
- Að verkefnið sé yngra en þriggja ára og jafnvel enn í þróun.
- Að verkefnið hafi alla burði til þess að festa sig varanlega í sessi.
- Að verkefnið hafi listrænan og samfélagslegan slagkraft.
- Að framtíðarsýn fyrir verkefnið sé skýr og stórhuga.
- Að verkefnið sé viðbót við menningarlandslagið í sínu nærumhverfi og auki fjölbreytileika menningarframboðs.
- Að verkefnið sé ekki rekið í hagnaðarskyni eða á vegum opinberra aðila.
Hvenær er skilafrestur umsókna?
Skilafrestur verður auglýstur síðar.
Hvernig sæki ég um?
Sótt er um með því að fylla út í eyðublað sem verður opnað síðar.
Hvernig fer valið fram?
Valnefnd er skipuð fulltrúum frá Byggðastofnun, Icelandair og Listahátíð í Reykjavík auk menningarfulltrúa af starfssvæði Byggðastofnunar. Valnefnd fer vandlega yfir hverja umsókn og fylgigögn. Metið er eftir þeim þáttum sem koma fram hér á undan.
Af umsækjendum hlýtur eitt verkefni sjálfa Eyrarrósina en henni fylgja 2.500.000 kr. peningaverðlaun, gert er myndband um verkefnið og því gefinn kostur á því að standa að viðburði á aðaldagskrá Listahátíðar í Reykjavík.
Að auki eru veitt þrenn hvatningarverðlaun Eyrarrósarinnar til verkefna sem hafa verið starfrækt í minna en þrjú ár. Hver hvatningarverðlaun eru 750 þúsund krónur.
