Metaxis

Innsetning fyrir tvístraða hljómsveit og rými

Nýtt, hrífandi verk eftir Önnu Þorvaldsdóttur mun flæða um Hörpu í flutningi Sinfóníuhljómsveitar Íslands á opnunarhátíð Listahátíðar. Í METAXIS leikur sjálft tónlistarhúsið burðarhlutverk en verkið er innsetning fyrir tvístraða hljómsveit og rými. Ólíkir hljóðfærahópar úr Sinfóníunni koma sér fyrir víðsvegar um húsið og áheyrendum gefst einstakt færi á að ganga um rýmið, kanna tónlistina og finna hvernig upplifunin breytist við hvert fótmál. Þannig skapast persónulegt samband hvers og eins við þetta nýjasta verk eins fremsta samtímatónskálds okkar. Hljóðheimur METAXIS er margslunginn og óvæntur rétt eins og húsið sem hann leikur um.

Anna Þorvaldsdóttir er margverðlaunað tónskáld og meðal annars handhafi tónlistarverðlauna Norðurlandaráðs. Verk hennar hafa verið flutt af mörgum helstu sinfóníuhljómsveitum og tónlistarhópum samtímans.

Hljómsveitarstjóri er Eva Ollikainen, aðalhljómsveitarstjóri Sinfóníuhljómsveitar Íslands. Verkið tekur um hálftíma í flutningi. Heimsfrumflutningur METAXIS er samstarfsverkefni Listahátíðar, Hörpu og Sinfóníuhljómsveitar Íslands.

Aðgangur er ókeypis en bóka þarf aðgöngumiða. Opnað verður fyrir bókanir þann 20. maí.